Aflaaq se oonchi hai

larz-e-zindagi


Bhari bazm mein cherh na tu , jo hai baat raaz ki,
Husn-e- benaqaab jalaal-e-aina saaz hai.

Jalawa bhi dar haqeeqat, hai tilissim-e-rung-o-bu,
Aur naghma-e-hayaat bhi fareb-e-awaaz hai.

Doobi khudi na gar teri ehsaas-e-bekhudi main ,
Zazba-e-baahami mehaz ehsaas-e-imtiaz hai..

Hai teri deen daari gar nukta-e-nazar he,
To tu banda hai na aur koi banda nawaaz hai.

Samjha hai jis ko tu ne ye hajoom-e-kaikshaan,
Woh chashma-e-khwabaan ki faqt ik aarzi parvaaz hai.

Tere junoon ki razm-e-khairo-shar se larz-e-zindagi,
Aflaaq se oonchi hai jo teri zabeen-e- niaz hai .


II


Kab tak chalegi gufatgoo, yoon parda-e-alfaaz main,
Haqeeqat numaayaan saaf hai, nadaani-e-hijaab main.

Na chhupa hajoom-e-jazba, ye mohtaj-e-lazzat-e-zubaan nahin,
Shiddat-e--junoon-e-nazaara, faqt zeb-e-daastaan nahin.

Idhar jaan ba-lubb hoon main bhi, aur jaan ba-lubb udhar tu,
Be-naqaabi-e-be-pravaah ka, zara dekhna assar tu.

Jo Kiya na chaaq daaman, woh daamn-e- ushaaq kahaan,
Jo ho daag-daar khird se, woh amaada-e-zabeen-e-pak kahaan !


III

Hum dav lagaane waale, kya mol-bhaav ki sochein,
Marmar ho ya daldal hon, kiyon, tapish-o-ghaav ki sochein.
Khwabon ko sajaana ho to bus khwabon ko sajaao
Bekhauf-e-shiddate-e dard hain,
Kiyon ghaav ki sochein.


IV


•
•khoye pal ke dil ke andar jeevan ka har bhed chhipa
khoye pal se hi paaya hai jo kucch tu ne paaya hai.
chhodne ka dar ek bhanwar hai, paaon ki zanjeer bani,
jisne bhi iss zameen ko chhora, wahi akaash pe chhaya hai.
chhupna uski aadat si hai, phir bhi sach kabh chhupta hai,
jitna sach tha khoye pal ka, utna saamne aaya hai.
tu bhi kabh tak jangal jangal chhupta phirta duniya se,
iss viraat andherepan mein, man tera rushnaaya hai. February 6, 2010


V

Ho agar hosh to itna
ke mad-hoshi ka aalam pahunche,
Rooh-e-jazbaat jo bharhke
to kahin aatish-e-sargam pahunche.

Sarfarazon ke liye sajjate hain sabh dar-o-rasan,
Ho ba-zid ishq mein lapton pe jo daaman pahunche.

Choom loon paayon jisse aatish-e-khurshid talab,
Ho fanaah dar tere magroor-e-kafan pahunche.

Kiya kehein aise dil-e-ashiq-e-gul ki auqaat
Ke kafan Jiska na ban aag ka parcham pahunche.
VI

Bikhre Marqaz

Kaayanaat ke bikhre hue markaz sabhi hum hain,
Hai alam ka har zarra chiragaan , tabhi hum hain,
Na ankur, na patta na saagar-o-sehra
Ho khoon mein toofan rawaan, jabhi hum hain.
Be-shumaar aate hain marg-e-ashiq ke sabab,
Marne ke mukaamaat to phir bhi kum hain.